Við fyrsta hanagal fimmtudaginn 9. febrúar var hópur 12 sundmanna mættur ásamt fararstjóra og foreldrum á Leifsstöð, á leið í flug til Kaupmannahafnar og þaðan með lest til Malmö í Svíþjóð til að taka þátt í hinum árlegu Malmö open leikum.  Ferðalagið gekk algjörlega áfallalaust og allir búnir að skrá sig inn á hótel og skola af sér ferðarykið fljótlega uppúr hádegi.  Korteri seinna voru allar mömmurnar mættar í H&M verslunina handan við götuna til að gera góð kaup.  Flestir reyndu að fara snemma í bælið þennan fyrsta dag til að safna orku fyrir átök helgarinnar.  

   Fyrstu kynni krakkanna af lauginni og keppnisaðstæðum voru svo seinnipart föstudags þegar þau tóku eina létta æfingu.  En áður en að því kom fóru allar mömmurnar nokkra hringi í H&M fyrripart föstudags. 

  Laugardagurinn var svo tekinn snemma.  Mætt út í laug um kl. 7:30 og tekin upphitun fyrir keppni sem hófst kl. 9:00.  Öllum deginum var svo eytt annaðhvort ofaní lauginni eða á laugarbakkanum, við keppni eða hvatningar.  Og þeir síðustu voru að yfirgefa lauginu um kl. 18:00 seinnipart laugardags.  Allra hörðustu mömmurnar skruppu svo aðeins í H&M um kvöldið áður en allir fóru í sameiginlegan kvöldverð á hótelinu og snemma í bólið.

  Sunnudagurinn byrjaði eins og laugardagurinn, eldsnemma.  Mótið byrjaði kl. 9 en var lokið rétt um hádegi sem gaf mömmunum nægan tíma til að heimsækja H&M það sem eftir lifði dags.  Hópurinn fór svo saman í kvöldverð á ítalskan veitingastað, og framhaldi af því að spila keilu fram eftir kvöldi, enda engin sundkeppni daginn eftir og hægt að sofa frameftir.  Flestir notuðu tækifærið á mánudeginum til að sofa frameftir, ekkert sérstakt um að vera fyrr en um kl. 20 þegar flugvélin átti að fara í loftið frá Kastrup.  Einhverjir brugðu undir sig betri fætinum eftir morgunverð og héldu til höfuðstaðar Danmerkur í heimsókn í dýragarðinn, á meðan að mömmurnar fóru síðasta hringinn í H&M.